Ji Çapemenî û Raya Giştî Re!

Em hevrêyên xwe Ronya Zagros, Gelhat Cûdî, Nûda Tolhildan û Yilmaz Piling ên ku li Herêmên Parastinê yên Medyayê di têkoşîna sala 2021’an de şehîd bûne, bi rêzdarî û minetdarî bibîr tînin.

Ewladên bi wêrek ên gelê Kurdistanê hevrêyên me Ronya, Gelhat, Nûda û Yilmaz di demên cuda de şehîd bûn. Bi îdîa û biryardariyeke mezin weke milîtanên fedayî yên têkoşîna azadiyê ya gelê me tevgeriyan. Her wezîfeya xwe bi serketî bi cih anîn. Hevrêyên me bawer dikirin ku li Kurdistanê azadî encex bi şer û têkoşîneke li ser xeta fedayîtiyê wê pêk were. Xeta fedayî ya Apoyî bi layiqî temsîl kirin û weke gerîlayên azadiyê yên ku soz û pratîka wan yek e, bi rola xwe rabûn. Ji bo Rêbertiya Azad, Kurdistana Azad bi fedayiyane têkoşiyan. Sekna hevrêyên me ya di jiyanê de û biryardariya wan a di têkoşînê de, wê timî pêşengiyê ji me re bike. Em soz didin ku sekna hevrêyên xwe û milîtaniya wan a fedayî ya Apoyî ji xwe re bikin mînak, armancên wan pêk bînin, heta ku em xeyalên wan pêk tînin têkoşînê bidomînin û bîranînên wan timî bidin jiyankirin.

Bi van hestan di serî de malbatên hêja yên hevrêyên me yên şehîd, em ji hemû gelê Kurdistanê yê welatparêz re sersaxiyê dixwazin.

dixwazin.

Agahiyên nasnameya hevrêyên me yên gihîştine şehadetê wiha ne:

Ronya Zagros – Azîze Kaplan

Gelhat Cûdî – Loqman Gazyak

Nûda Tolhildan – Ceylan Tekîn

Yilmaz Piling – Bunyamin Yildiz

Ronya Zagros – Azîze Kaplan - Bajarê Wanê piştî ku rastiya Rêber Apo û PKK’ê nas kir, bû yek ji navendên herî girîng a welatparêziya Kurdistanê. Ji nava xwe bi hezaran milîtanên azadiyê û fedayiyên hêja derxist holê. Ev hevrêyên me yên fedayî bi temamî xwe fedayê azadiya gelê me kirin. Hem bi têkoşîna xwe, hem bi jiyana xwe, hem jî bi şehadeta xwe bûn bingehê siberoja azad a gelê me. Lewma gelê me her tim bi dilsozî û baweriyeke xurt girêdana xwe ya bi van fedayiyan re domandine.

Hevrêya me Ronya jî ya ku ji nava gelê me yê Wanê yê hêja derketî, li navçeya Şaxê di nava malbateke welatparêz û taybetmendiyên xwe yên Kurdîtiyê parastiye de, hate dinê. Lewma hevrêya me Ronya jî girêdayî nirxên çandî û exlaqî yên ku ew ava kirine, mezin bûne. Malbata wê ji ber sedemên cur be cur koçî metropola Tirkiyeyê Stenbolê kir, lewma neçar ma li vir mezin bibe. Ti carî ji Kurdistanê qut nebû. Hevrêya me Ronya heya dibistana seretayî xwend, ji bo alîkarî bide debara malbata xwe ji temenê biçûkahiyê ve dest bi kar kir. Hevrêya me Ronya bi kesayeta xwe ya xebatkar, fedakar û jîr hem rêzdariya malbata xwe, hem jî ya her kesê li derdora xwe qezenc kir. Ji ber ku ji xizmên wê yên nêz gelek kes tevlî nava refên gerîla bûne, têkoşîna me ya azadiyê ji nêz ve nas kir. Hevrê Ronya piştî ji Kurdistanê veqetiya, hesreta xwe ya welêt kir bingehê lêgerîna xwe ya dema ciwantiyê. Her çendî ku êdî li Stenbolê dijî û dixebite jî, mejî û dilê wê her tim li Kurdistana qedîm bû. Hevrêya me Ronya hesreta çiyayan dikişand, ti carî xwe ayîdê metropolan nedît, hîs nekir. Lewma her tim berê hevrêya me li Kurdistanê bû, timî xeyal kir ku vegere xaka xwe. Hevrê Ronya di dema ciwantiyê de bû şahidê şerê li Kurdistanê û êrîşên qirkirinê yên dijmin ên li hemberî gelê me. Lewma li dijî dewleta Tirk bû xwedî hêrseke mezin. Bi taybetî Komploya Navneteweyî ya li dijî Rêbertiya me, xwedî derketina gelê me ya li Rêbertî û şehadetên çêbûn, bandoreke kûr li hevrêya me Ronya kir. Weke jineke ciwan a Kurd bawer kir ku divê ew jî êdî tevlî têkoşîna azadiyê ya gelê me bibe û berpirsyariyên xwe yên li hemberî gelê me bi cih bîne. Hevrêya me fikirî ku vê yekê bi tevlîbûneke herî bi bandor û radîkal dikare pêk bîne. Li ser vî bingehî hevrêya me sala 2000’an berê xwe da çiyayên Kurdistanê, tevlî nava refên gerîla bû û bû şervaneke azadiyê ya ku xwe fedayê azadiya Rêber Apo kir.

Hevrêya me Ronya ji biçûkahiya xwe û vir ve çiya weke warê azadî û jinûve ji dayikbûnê pênase kir. Di encamê de zemînê ku xwe jinûve ava bike, dît. Hevrêya me perwerdeya xwe ya ewilî ya nava refên gerîla, li herêma Qendîl dît. Bi saya van perwerdeyan demek kurt bi jiyana çiyê û gerîla re bû yek. Dilsoziya wê ya bi çiyayan re bû sedem ku hevrê Ronya bi rengekî aktîf û bi coş tevlî her kêliya jiyanê bibe. Dema ku tevlî nava refên gerîla bû weke Tevger em di demên zehmet re derbas dibûn, lê hevrê Ronya ji ber hezkirin û dilsoziya xwe ya bi Rêbertî re bi ti rengî ji van nîqaş û pirsgirêkan bandor nebû. Hevrêya me xwe fedayî fêmkirina Rêber Apo kir, li ser vî bingehî hemû derfetên di destê xwe de bi kar anî û di felsefeya azadiyê ya Rêbertiya me de kûr bû. Ji ber êrîşên leşkerî yên li ser tevgera me, fêm kir ku divê di hunera şerê gerîla de bibe pispor. Hevrêya me Ronya bi hewldana ku di gerîlatiyê de kûr bibe, ji hemû hevrêyên xwe re bû mînak. Hevrêya me pir girêdayî Rêbertiya me û şehîdên me bû. Bi van taybetmendiyên xwe bû milîtaneke jin a Apoyî ya azad.

Êrîşên li hemberî Rêbertiya me û gelê me ti carî kêm nebûn, weke milîtaneke jin a Apoyî bi cih anîna wezîfe û berpirsyariyên xwe, weke deynekê dît. Hevrêya me Ronya di ferqê de bû ku vê yekê encex dikare bi tevlîbûneke fedayiyane pêk bîne. Li ser vî bingehî pêşniyar kir ku derbasî xebatên Hêzên Taybet bibe. Ev pêşniyara wê ji aliyê hevrêyên wê ve bi erênî hate pêşwazîkirin û derbasî perwerdeya dewreya esas bû. Hevrêya me bi perwerdeyan fêr bû ku fedayîtî şêwazekî jiyanê ye, di tevahiya jiyana xwe de bi zanebûna fedayîtiyê meşa xwe ya şoreşgeriyê domand. Lewma armanc kir ku her xebatê bi ser bixe.

Di çarçoveya Pêngava 1’ê Hezîranê ya Dîrokî de ku Tevgera me sala 2004’an da destpêkirin, gerîla li Bakurê Kurdistanê kete nava liv û tevgerê, darbeyên giran li dewleta Tirk xist û ruhê şoreşgerî derket holê, vê yekê hevrêya me Ronya pir bandor kir. Weke gerîlayeke YJA Starê ya fedayî hevrêya me xwest di vê pêngava dîrokî de cih bigire, bi israr xwest biçe Saha Dersimê. Bi saya sekna xwe ya di jiyanê de û tevlîbûna xwe ya aktîf, hevrêya me sala 2006’an berê xwe da Dersimê û li vir heya sala 2010’an têkoşîn meşand. Hevrê Ronya li Dersimê di gelek çalakiyên li dijî artêşa Tirk de cih girt, di her çalakiyê de bi fedayîtiya xwe bi rola xwe rabû. Li çiyayên Dersimê li pey şopa Besê û Sarayan meşiya û bi milîtaniyeke hêja wezîfeyên xwe yên dîrokî bi cih anî. Îradeya fedayî ya Apoyî temsîl kir û gelek tecrûbeyên girîng bi dest xist. Hevrêya me Ronya weke milîtaneke jin soza tolhildana jinên ku li Dersimê hatine qetilkirin û xwe ji zinaran avêtine da. Piştî ku wezîfeya xwe ya li vir qedand, weke fermandareke YJA Starê ya xwedî tecrûbe derbasî Herêmên Parastinê yên Medyayê bû.

Hevrê Ronya dixwest pratîk xwe ya çar salan li Dersimê û tevahiya jiyana xwe ya têkoşînê li ser bingeha paradîgmaya Demokratîk, Ekolojîk û Azadiya Jinan a Rêber Apo binirxîne. Ji bo vê armancê, ew tevlî perwerdeya li Akademiya Jinên Azad a Şehîd Bêrîtan bû. Hevrêya me ji aliyek ve xwest pratîka şer a ku jiyaye derxe zanabûnê û veguherîne tecrûbeyê û ji aliyê din ve jî xwest xwe di fermandariyê de pêş bixe. Li ser van mijaran lêhûrbûnên kûr jiyan. Bi hewldan û biryardariya xwe ya di vê pêvajoyê de, hurmeta hevrêyên xwe bi dest xist. Hevrê Ronya, di zemîneke xweser de bi hevrêyên xwe yên jin re perwerde dîtin, wekî derfetek girîng dît. Bi lêhûrbûn û dîsîplîna xwe ya di dema perwerdeyê de, ew bû gerîlayek PAJK û fermandareke YJA Star a mînak. Piştî ku perwerdehiya xwe qedand, bi azwerî û biryardariyek mezin berê xwe da xebata pratîkî.

Hevrê Ronya, li gelek qadên Herêmên Parastinê yên Medyayê tevlî xebatan bû. Bi taybetî ji bo ku pîvanên Şerê Gel ê Şoreşgerî bi rengekî serketî pêk bîne, kedek mezin raber kir. Di vê pêvajoyê de, wê xwe bi berdewamî pêş xist û zanîna xwe bi hevalên xwe re parve kir. Hevrêya me bi vê sekna xwe di pêşveçûna kalîteyî ya têkoşîna azadiyê de tevkariyên girîng kir. Ji bo pêşîgirtina li êrîşên dagirkeriyê yên dewleta Tirk ên li ser Herêmên Parastinê yên Medyayê, ew bi israr pêşniyar kir ku derbasî herêma Heftanînê bibe. Hevrêya me li Haftanînê bû fermandara eniya pêş. Li herêma Haftanînê ji bo amadekirina hevalên xwe ji bo şerekî muhtemel kedek mezin raber kir û di demeke kurt de hurmet û baweriya hevrêyên xwe bidest xist. Bi enerjiya ku nîşan da, rê da hevalên xwe ku zû pêş bikevin û ji bo şer amade bin. Hevrê Ronya di birêxistinkirina berxwedanek bi bandor a li dijî êrîşên dagirkeriyê yên ku di sala 2019’an de pêş ketin de rolek pêşeng lîst. Bi vê berxwedanê re, rê li ber pêşveçûna hêzên dagirker girt û peywirên xwe yên demê bêqusûr bi cih anî. Hevrê Ronya, piştî ku peywira xwe li Heftanînê bi serketî temam kir, tevlî xebatên azadiya jinan bû. Li vir jî piştî demek kurt ma, vê carê derbasî xebatên Hêzên Taybet bû. Wê bê westan xebitî da ku şêwaza gerîla ya nû bi bandor û serketî bicîh bîne. Ew her gav li kêleka hevalên xwe bû û hewl da ku barê wan sivik bike. Her çend dilê wê dixwest biçe deverên ku şer lê giran bû jî, hevrê Ronya ji ber girîngiya xebata xwe nekarî vê xwesteka xwe pêk bîne.

Hevrê Ronya mîna sembola dirustî, dilsozî û nasnameya jina azad dihat naskirin. Hevrêya me di 20’ê Mijdara 2021’an de dema ku li herêma Qendîlê li ser peywira xwe bû, di êrîşeke dijmin de şehîd bû. Hevrê Ronya, ku ji Qendîlê heta Dersimê Kurdistanê gav bi gav geriya, ji bo têkoşîna azadiya gelê xwe bêwestan heta kêliya dawiyê bi nirxên azadiyê ve girêdayî ma. Em weke hevrêyên wê soz didin ku xeyala hevrê Ronya ya welatekî azad pêk bînin.

Gelhat Cûdî – Loqman Gazyak - Hevrê Gelhat li keleha berxwedanê ya Botanê li Cîzîra Botanê, di nav malbateke ji eşîra Kiçî de, ji dayik bû. Ji ber malbata wî welatparêz bû û nirxên Kurdbûnê diparast, hevrê Gelhat li ser esasê cewhra xwe mezin bû. Hevrê Gelhat demekê li dibistanên dewletê yên Tirkiyeyê xwend, lê dema ku fêm kir ku dewleta Tirk hewl dide bi rêya dibistanan zarokên Kurd asîmîle bike, dev ji dibistanê berda. Ev yekem çalakiya wî ya berxwedanê li dijî polîtîkayên qirkirinê bû. Piştî ku ji dibistanê derket, hevrê Gelhat bi awayekî serbixwe xwe pêş xist û wekî ciwanek ku dilsozê nirxên bingehîn ên gelê xwe bû, mezin bû. Ji bo ku tevkarî li debara malbata xwe bike, di karên herî zehmet de xebitî û bi fedakariya xwe hezkirin û hurmeta derdorên xwe bidest xist. Mîna her zarokek Kurd ê li Kurdistanê ji dayik bûye û mezin bûye, hevrê Gelhat jî ji temenê xwe ya biçûk ve têkoşîna azadiya Kurd nas kir û di nav van nirxan de mezin bû. Hevrê Gelhat ji ber tevlîbûna gelek nasên xwe yên ji eşîra Kiçî di têkoşîna azadiyê û şehadetên piştî wê de, pir bandor bû. Hevrê Gelhat, ku ji temenê xwe yê zaroktiyê ve bi guhdarîkirina çîrokên qehremaniyê yên gerîlayan mezin bû, tevlîbûna nava refên gerîla wekî armanca herî sereke diyar kir. Mezinbûna wî li herêmek mîna Cîzra Botan, ku bi serhildan û berxwedanê re hevwate ye, faktorek girîng bû ku bandor li wî kir. Qabîliyeta gel a parastina rûmeta xwe li hember her cûre êrîşên dijmin û ji nirxên xwe yên azadiyê tewîz nedayîn, ji bo hevrêyê me bûye çavkaniya moral û manewiyetê. Di salên 2010 û 2011’an de ji ber tevlîbûna xizm û endamên malbatê di nava refên gerîla de gelek bandor bû û rê li ber lêgerîna tevlîbûna têkoşînê vekir. Demek ew tevlî xebatên ciwanên şoreşger û welatparêz bû û bi vî rengî derfeta ji nêz ve naskirina têkoşînê bi dest xist. Hevrêyê me Gelhat di sala 2013’yan de ji bo pêkanîna xeyalên xwe berê xwe da Cûdiyê Mirada û tevlî nava refên gerîla bû.

Hevrê Gelhat nêzîkî mehekê li herêma Cûdî ma û perwerdehiya xwe ya destpêkê ya şerê gerîla ji hevrêyên xwe girt. Hevrê Gelhat, li herêma Cûdî ji hevrêtî, jiyana komunal û nêzîkatiya mirovî ya gerîlayan bandor bû û armanc kir ku bibe mîlîtanek mîna wan. Çand, perwerde û exlaqê ku ji malbata xwe wergirtibû bi felsefeya jiyana azad a Rêber Apo re kir yek û di kesayetiya xwe de veguherînên girîng çêkir. Hevrê Gelhat piştî demeke kurt li herêma Cûdî ma, li ser pêşniyarên hevalên xwe ji bo perwerdehiyek berfirehtir derbasî Herêmên Parastinê yên Medyayê bû û tevlî perwerdeya şervanên nû bû. Hevrê Gelhat, ku êdî mîlîtanek xwedî tecrûbe bû, bi ezmûnên ku di vê perwerdehiyê de bi dest xistibû, bû gerîlayek azadiyê yê jêhatî. Hevrê Gelhat tecrûbeyên jiyanê yên ku li Bakurê Kurdistanê bi dest xistibû bi hevalên xwe yên ku bi wan re perwerde dîtibû re parve kir û peywirên xwe yên mîlîtaniyê pêk anî. Hevrê Gelhat bi rêya dersên Dîroka Kurdistan û PKK’ê yên ku wergirt, li ser rastiyên gelê me û têkoşîna me zanînên nû bi dest xist. Ev zanîn hişt ku ew kesayetiya xwe binirxîne û pêşketinên girîng bi dest bixe. Hevrê Gelhat, ku ji berê ve xwediyê zanîna leşkerî bû, bi perwerdehiyê re ev zanîn xurttir kir û hemû hûrguliyên şerê gerîla hîn bû. Bi baldarî û hesasiyeteke mezin tevlî perwerdeyê bû, gihîşt astek xurt û perwerdehiya xwe bi serketî qedand. Bi tevlîbûna xwe ya çalak û kesayetiya xwe ya jidil û rast, hurmeta hemû hevrêyên xwe bi dest xist û bû milîtanê Apoyî yê mînak.

Hevrê Gelhat piştî perwerdehiyê bi demeke kurt ji bo bersivdayîna êrîşên li li dijî seranserê Kurdistanê yên li ser gelê me, tevlî xebatên projeya jinûve avakirina gerîla bû. Li ser vê bingehê ew di dibistana operasyonan de bi giranî perwerdehiya leşkerî wergirt. Piştî perwerdehiya li vir hevrêyê me Gelhat bû milîtanek jêhatî û xwe ji bo her peywirê û berpirsyariyê amade dît. Ji ber vê sekna xwe bawerî da hemû hevrêyên xwe. Hevrêyê me yê ku tevlî xebatên pratîkê bû, di hemû xebatan de bi taybetmendiya xwe ya fedekar û kedkar derket pêş. Hevrêyê me ku qet xwe ji kar dûr nexist, bi vê sekna xwe hurmeta hevrêyên xwe bi dest xist. Di sala 2015’an de piştî êrîşên zêde yên dewleta Tirk li ser gelê me û têkoşîna azadiyê dest pê kir, hevrê Gelhat xwest bi rengekî çalaktir tevlî têkoşîna serdema nû bibe. Ji ber vê bawer kir ku ew dikare vê tevlîbûnê di nava xebatên Hêzên Taybet de bibandortir pêk bîne.

Hevrê Gelhat ê ku tevlî xebatên Hêzên Taybet bû, bi perwerdehiya ku li vir wergirt re, rihê fedaî yê di kesayetiya xwe de pêş xist. Hevrêyê me bûyîna milîtanekî Apoyî yê jêhatî, pispor û profesyonel ji bo xwe weke armancek sereke diyar kir û ji bo vê kedeke mezin raber kir. Hevrê Gelhat ê ku her tim hewl dida xwe perwerde bike û pêş bixe, bi vê sekna xwe ji bo hevalên xwe bû mînak. Hevrê Gelhat ji ruhê fedaî ku di sala 2016’an de li Bakurê Kurdistanê û metropolên Tirkiyeyê pêş ket bandor bû û li ser vê lêhûrbûnên xwe kurtir kir. Di vê pêvajoyê de, wî xwe ji hêla îdeolojîk, leşkerî û manewî ve pêş xist û perwerdehiya xwe wekî şervanekî fedaî yê jêhatî bi rengekî serketî temam kir.

Hevrê Gelhat piştî perwerdeyê, di binesaziya Hêzên Taybet de tevlî gelek xebatên girîng bû. Bi saya kesayetiya xwe ya dirust û jidil û şêwaza xebata xwe ya bi dîsîplîn û baldarî, hemû peywirên ku tê de cih girt, bi rengekî serketî pêk anî. Hevrê Gelhat, ku bi fedakariya xwe derket pêş, di amadekirina binesaziya şer a li herêma Şehîd Delîl a Rojavayê Zapê de tevkariyên mezin kir. Biryardarî, hewldan û fedekariyên ku kirine, di pêvajoyên piştre de jî tevkariyên mezin ji bo têkoşîna me kir. Bi jiyana xwe ya dilnizm, hevrêtiya xwe ya xurt û dilsoziya xwe ya bêdawî ya bi nirxên azadiyê re, hurmet û hezkirina hemû hevalên xwe bi dest xist. Hevrê Gelhat di 27’ê Kanûna 2021’an de li herêma Garê ligel hevrê Yilmaz (Bunyamîn Yildiz), di êrîşeke dijmin de şehîd bû. Weke hevrêyên wî em soz didin ku, em ê teqez armanc û xeyalên hevrê Gelhat pêk bînin.

Nûda Tolhildan – Ceylan Tekîn- Hevrêya me Nûda li bajarê Mûşê di nava malbateke welatparêz de ji dayîk dibe. Lê belê ji ber hin sedemên cuda malbata wê neçar dimîne ku koçî Stenbolê bike û ew jî li wir mezin dibe. Hevrêya me ji ber ku ji dûrî welatê me Kurdistanê mezin dibe derfeta jiyîna cewhera Kurdayetiyê zêde bi dest naxe û tevî vê yekê jî dikare cewhera hebûna xwe biparêze. Hevrêya me 12 salan diçe dibistanên dewletê û di salên dibistanê de cara ewil nakokiyên xwe dijî. Hevrêya me bi taybetî ji tim û tim bilêvkirina gotinên nîjadperest ên li ser nasnameya wê yên li dibistanê hêrs dibe û ji ber vê yekê lêgerînên xwe yên têkildarî nasnameyê jî kûr dike. Hevrêya me piştî vê pêvajoyê zêdetir dipirse bê ka çima malbata wê neçar maye ji welatê me Kurdistanê koçî Stenbolê bike û sedemên polîtîkayên komkujiyê yên li ser gelê me çi ne û roj bi roj li gel cewhera xwe û bersivên van pirsan hewl dide cewhera xwe peyda bike. Bi taybetî yekkirina gelê me û nirxên cewherî ya ji aliyê Rêber Apo û PKK’ê ve ya bi fedekariyeke mezin û meşandina têkoşîneke bêhempa ya ji bo vê yekê, bandoreke mezin li hevrêya me dike. Hevrêya me ji ber van yekan ji bo ku rastiya têkoşîna me zêdetir nas bike dest bi lêgerînan dike û weke pêngava yekem tevgera ciwanên welatparêz nas dike. Hevrêya me Nûda di vê pêvajoyê de ji jiyan, sekn û nêzîkatiyên ciwanên welatparêz ên nas dike, bandor dibe û dest bo beşdarbûna hin çalakiyan dike. Hevrêya me Nûda li ser zêdebûna gotinên nîjadperest ên li dijî gelê me yên di erdheja Wanê de û li Roboskiyê qetilkirina 34 însanên me biryarê dide ku bi awayekî çalaktir tevlî têkoşînê bibe û di nirxandineke xwe de tîne ziman ku ew li cihekî ku lê li dijî gelê me nêzîkatiyên biçûkxistinê û qetilkirin hene bêdengbûn û temaşekirinê rast nabîne û tevlî xebatên ciwanên şoreşger ên welatparêz dibe. Hevrêya me  êdî zêdetir têkoşîna gelê me ya ji bo azadiyê nas dike û roj bi roj xwe pêş dixe û dibe xwediyê tevlîbûneke çalaktir. Hevrê Nûda di heman demê de coşa yekbûna cewheta xwe dijî û dest bi lêgerîna mezinkirina têkoşîna xwe ya li ser vê bingehê dike. Hevrê Nûda ji ber xebatên xwe yên serkeftî carekê tê binçavkirin û li vir rastiya dijmin baştir nas dike. Hevrêya me Nûda li vir li hemberî hemû êrîşên dijmin ên psîkolojîk li ber xwe dide û van extan dike egera têkoşîna zêdetir. Di 9’ê Çileya 2013’an de li Parîsê hedefgirtina nemerdane û şehîdkirina yek ji pêşengên têkoşîna me ya azadiyê hevrêya me Sara-Sakîne Cansiz û hevrêyên me yên li gel Leyla û Rojbîn ji bo hevrêya me Nûda dibe mezintirîn sedema tevlîbûna nava têkoşîna azadiyê. Hevrêya me girêdayî vê yekê di heman salê de berê xwe dide çiyayên Kurdistanê, tevlî nava refên gerîlayan dibe û têkoşîna xwe vediguhezîne qonaxeke din ya nû.

Hevrêya me piştî ku tevlî nava refên gerîlayan dibe navê hevrêya me Şehîd Nûda Karker- Nazan Bayram li xwe dike û di kêliyên destpêkê de sekna xwe ya di nava têkoşînê de nîşan dide. Hevrê Nûda ji roja ewil ya di nava gerîlayan de û pê ve hêmana sereke ya jê bandor dibe, wekheviya di nava gerîlayan de ye. Wekhevbûna gerîlayên herî kevn û yên herî nû ji bo hevrêya me Nûda dibe rewşeke nû û di heman demê de jiyana ku hesreta wê dikir bi xwe bû. Hevrê Nûda perwerdeya şervanên nû li herêma Garê dibîne û bi saya perwerdeyên îdeolojîk yên li vir dibîne rastiya xwe baştir nas dike. Hevrêya zirarên dijmin ên di nava civakê de pêk anîne û bi taybetî jî yênli ser jinan li ser kesayeta xwe analîz dike û ji bo xwegihandina xeta jina azad dikeve nava hewldaneke mezin. Hevrêya ji van hewldanên xwe encamên girîng bi dest dixe û bi saya paqijbûn û duristbûna xwe ji aliyê hemû hevrêyên xwe ve gelekî tê hezkirin û jêre rêz tê girtin. Hevrê Nûda eleqeyeke mezin nîşanî hunera şerê gerîlayan dide û dizanî ku bes dema bibe gerîlayeke serkeftî wê bikaribe hêrs û nefreta xwe ya li hemberî dijmin veguherîne çalakiyê. Hevrêya me girêdayî vê yekê bi coş û kelecaneke mezin tevlî perwerdeyên leşkerî dibe û di demeke kurt de gelek taktîkan hîn dibe. Hevrêya me di tevahita perwerdeyê de bi sekna xwe ya fedekar, kedkar, bicoş û kamil bala hemû hevrêyên xwe dikşîne û dibe gerîlayeke YJA Starê ya mînak.

Hevrêya me Nûda ji bo ku xwe di warê leşkerî de zêdetir pêş bixe û ji daxwaza gelê me ya azadiyê re bibe bersiv tim û tim kûr dibe û dixwaze tecrûbeyên têkoşîna me yên bêhempa bi dest bixe. Hevrê Nûda girêdayî vê yekê weke pêngava yekem di Akademiya Şehîd Rojîn Gewda de li gel hevrêyên xwe yên jin perwerdeya operasyonê distîne û piştre jî perwerdeya pisporbûnê distîne û xwe di warê leşkerî de gelekî pêş dixe. Hevrê Nûda ya ku dibe gerîlayeke YJA Starê ya jixwebawer, bihêz û xwedan tecrûbe, bi çar çavan li benda tevlîbûna xebatên pratîkê dimîne.

Hevrêya me Nûda li ser destpêkirina êrîşên dewleta Tirk ên li ser gelê me û têkoşîna me ya azadiyê yên dijwar ên ji sala 2015’an û pê ve, derbasî herêma Zapê dibe lu lê şer dijwar e û di nava demeke kurt de adapteyî şert û mercên şerî ên li vir dibe. Hevrê Nûda weke milîtaneke jin a pispor hemû erk û berpirsiyariyên xwe bi cih tîne û dibe xwediyê sekneke beramberî mîsyona pêşengtiyê. Hevrêya me li herêma Zapê nêzîkî çar salan li ber xwe dide û li vir di nava gelek çalakiyên li dijî dijmin tên lidarxistin de cihê xwe digire. Hevrêya me ya ku di lêxistina derbeyên giran ên li artêşa Tirk de roleke çalak digire ser milên xwe û bi wêrektî û sekna xwe ya bibiryar hêzê dide hemû hevrêyên xwe. Hevrê Nûda piştî pratîka zêde ya li herêma Zapê ji bo nirxandina vê pêvajoyê,  standina dersên hewce û avêtina pêngavên mezintir pêşniyar dike ku derbasî perwerdeyên îdeolojîk bibe û girêdayî vê yekê derbasî Akademiya Şehîd Berîtan a Jina Azad dibe. Hevrê Nûda li vir bi saya perwerdeya distîne û kûrbûnên xwe li ser kesayeta xwe guherînên mezin pêk tîne û dibe milîtaneke xwedan îdîayên mezintir. Hevrêya me bi taybetî ji bo ku xeta jina azad li ser kesateya xwe biafirîne, dikeve nava pêvajoya kûrbûnê ya girîng û ji nêzîkatiyên paşverû yên ji aliyê pergalê ve li ser jinan tên ferzkirin, dihese û li dijî wan têdikoşe. Bi vî awayî weke milîtaneke jin a azad zêdetir xwedî li erkên xwe yên serdemê derdikeve û dest bi lêgerîna pratîkkirina wan dike.

Hevrê Nûda piştî ku perwerdeya xwe bi awayekî serkeftî temam dike, pêşniyar dike ku derbasî yek ji herêma ku lê şer dijwar e Heftanînê bibe û pêşniyara hevrêya me hate qebûlkirin û derbasî herêma Heftanînê dibe. Hevrê Nûda dibe yek ji hevrêyên me yên ku li dijî operasyonên dewleta Tirk ên li ser ser qada Heftanînê derbasîçalakiyê dibe û li vir derbên giran li dijmin dixe. Hevrê Nûda li gel hevrêyên xwerê nade êrîşên dijmin û ji kêliya yekem û pê ve dibe milîtaneke mînak û hevrêyên wê jêre rêzê digire.  Piştre di êrîşên dagirkeriyê yên nû yên di sala 2020’an de jî dibe yek ji hevrêya me ya ku bi awayê herî bi bandor bersivê dide û di mezinkirina berxwedanê de pêşengtiyê dike. Hevrê Nûda li hemberî êrîşên artêşa Tirk ên bi seferberkirina hemû derfetan pêk tîne, bi awayekî fedaiyane li ber xwe dide û dibe yek ji afirînerên destana berxwedana dîrokî ya li Heftanînê tê nivîsandin. Hevrê Nûda tevî ku artêşa Tirk li herêma Heftanînê hin herêman dagir dike jî li vir dimîne û di domandina berxwedanê de israr dike û di vê pêvajoyê de jî rola xwe dilîze. Hevrê Nûda ya xwedan ruhekî fedai û sekneke ku tu caran têkçûnê qebûl nake, di 11’ Gulana 2021’an de tevlî karwanê şehîdan dibe û dikare meşa xwe ya azadiyê ya bi îdîa û biryardariyeke mezin da destpêkirin di astên herî jor de temam bike. Weke hevrêyên wê em soz didin ku em ê teqez têkoşîna azadiyê ya dewrî me kiriye bi serkeftinê tacîdar bikin.

Yilmaz Piling – Bunyamin Yildiz - Hevrêyê me Yilmaz  li navçeya Pasûr a Amedê di nava malbeteke welatparêz û girêdayî nirxên Kurdayetiyê ji dayîk dibe. Ji ber vê taybetmendiya malbatê, hevrêyê me Yilmaz jî wisa mezin dibe. Hevrê Yilmaz dibistana seretayî li gundê xwe yê ku lê ji dayîk dibe û mezin dibe, dixwîne û piştre derbasî Pasûrê dibe û li vir xwendina xwe didomîne. Hevrê Yilmaz her çend dizane ku dewleta Tirk hewl dide bi rêya dibistanan ciwanên Kurd asîmîle bike û wan ji cewhera wan dûr bixe jî dixwaze bixwîne û bibe ewladekî layiqî gelê me. Ji ber ku hevrêyê me xwediyê vê hişmendiyê bû xweparastina ji polîtîkayên dewleta Tirk ên asîmîlasyonê esas girt. Hevrê Yilmaz piştre ji bo xwendina lîseyê derbasî navenda Amedê dibe û li vir yekem nakokiyên xwe dijî. Her çend haya hevrêyê me ji rastiya dewleta Tirk hebe jî li Amedê bi awayekî zelaltir rastiya dijmin dibîne. Li hemberî êrîşên li ser daxwazên gelê me yên herî rewa jî gelekî hêrs dibe. Hevrê Yilmaz roj bi roj rûyê dijmin ê komkujiyê baştir dibîne û gihîşt wê hizrê ku weke ciwanekî Kurd divê erk berpirsiyariyên xwe yên li hemberî gelê me bi cih bîne. Hevrê Yilmaz girêdayî vê yekê dest bi lêgerînan dike û weke pêngava yekem di nava çalakiyên ciwanên welatparêz de cih digire û tevlî têkoşîna birêxistinkirî dibe. Hevrê Yilmaz bi vî awayî derfeta têkoşîna me ya azadiyê ya ji nêz ve bi dest dixe û roj bi roj tempoya xwe ya têkoşînê bilindtir dike. Hevrêyê me bi taybetî jî bi qasî ku rastiya Rêber Apo nas dike coşa xwe ya têkoşînê zêdetir dike û di xebatên xwe de digihîje pozîsyona pêşengbûnê. Hevrê Yilmaz di birêxistinkirin, zanedarkirin û tevlîbûna nava refên gerîlayan a gelek ciwanan de xwediyê kedeke mezin e û erkên xwe yên şoreşgeriyê bi awayekî serkeftî bi cih tîne. Hevrêyê me ji ber vê yekê dibe hedefa dijmin û carekê ji aliyê dijmin ve tê binçavkirin. Hevrêyê me li vir li hemberî dijmin sekneke şoreşgerî nîşan dide û bi tu awayî ji sekna xwe ya milîtanî tawîzê nade. Hevrê Yilmaz ji Şoreşa Azadiya Rojava a gelê me li gel dayîna bedêlên mezin pêk tîne, bandor dibe û ji ber vê yekê dixwaze têkoşîna xwe mezintir bike û ji hêviya gelê me ya azadiyê re bibe bersiv. Hevrêyê me Yilmaz dikeve nava lêgerînên bi vî rengî û berovajî gotinên derewîn ên dijmin ên têkildarî aşitiyê, pê hesiya ku dijmin dixwaze li ser gelê me komkujiyan pêk bîne. Hevrêyê me Yilmaz li hemberî vê yekê weke ciwan û şoreşgerekî Kurd dizanî ku erka wî ya sereke xurtkirina parastina gelê me ye û gihîşt wê baweriyê ku wê ev yek jî bes bi rêya mezinkirina gerîlayan pêk were. Hevrê Yilmaz girêdayî vê yekê di dawiya sala 2013’yan de berê xwe da çiyayên Kurdistanê, tevlî nava refên gerîlayan dibe û dibe şervanekî têkoşîna azadiyê yê tu caran têk naçe.

Hevrê Yilmaz piştî ku tevlî nava refên gerîlayan dibe yekem perwerdeya xwe li herêma Garê distîne û bi saya van perwerdeyan di nava demeke kurt de adapteyî jiyana çiya û gerîlayan dibe. Hevrêyê me ji hevrêtiya kûr a gerîlayan û jiyana komunal bandor dibe û dizanî ku ji bo ku bibe milîtanekî Apoyî yê serkeftî divê xwe di warên leşkerî û îdeolojîk de pêş bixe. Hevrê Yilmaz bi vê hişmendiya xwe tevlî perwerdeyan dibe û hemû dersên distîne, dike taybetmendiyên kesayeta xwe û ji bo ku wan di pratîkê de nîşan bide hewl û kedeke mezin nîşan dide. Hevrêyê me ji ber van yekan di kesayeta xwe de guherînên mezin pêk tîne û bi saya vê sekna xwe ji hevrêyên xwe yên li gel wan perwerdeyê distîne re dibe mînak. Hevrê Yilmaz bi eleqeyeke mezinli nêzî perwerdeyên leşkerî dibe û dixwaze demildest weke şervanekî bihêz bi awayê herî bihêz bersivê bide êrîşên li ser hebûna gelê me. Hevrêyê me Yilmaz bi vê hişmendiyê li nêzî hunera şerê gerîlayan dibe û di nava demeke kurt de tecrûbetên têkoşîna me bi dest dixe û xwe gelekî pêş dixe. Hevrêyê me di pêvajoya perwerdeyê de tevlîbûneke çalak û bicoş nîşan dide û dibe milîtanekî Apoyî yê ku ji aliyê hemû hevrêyên xwe ve gelekî tê hezkirin û jêre rêz tê girtin.

Hevrêyê me Yilmaz piştî ku perwerdeyên xwe bi awayekî serkeftî temam dike dubare li herêma Garê beşdarî xebatên pratîkê dibe û dibe xwediyê pratîkeke serkeftî. Hevrêyê me di vê pêvajoyê de gelekîji Berxwedana Rêveberiya Xweser a li Bakurê Kurdistanê pêş dikeve, bandor dibe û di heman demê de ji ruhê şoreşgerî yê derdikeve holê hêzeke mezin distîne. Hevrê Yilmaz ji ber vê yekê difikire ku divê bi xwe jî têkoşîna xwe mezin bike û digihîje wê baweriyê ku wê bes bi vî awayî ji şehadetên pêk tên re bibe bersiv. Hevrê Yilmaz bi taybetî ji şehadetên di nava xizmên xwe yên nêz de bandor dibe û girêdayî vê yekê pêşniyar dike ku derbasî nava xebatên Hêzên Taybet bibe. Hevrêyê me di vê navbera de nameya hevrêya me Zîlan- Zeynep Kinaci dixwîne û ji nirxandin û ruhê fedai yê hevrêya me Zîlan gelekî bandor dibe. Ji ber vê yekê êdî biryarê dide ku jiyana xwe weke fedaiyekî bidomîne. Ji ber sekna xwe ya milîtanî û îdîaya xwe ya bihêz pêşniyara hevrêyê me tê qebûlkirin û girêdayî vê yekê beşdarî perwerdeya dewreya sereke dibe. Hevrêyê me li vir di serî de ji hevrêyê me Şehîd Şervan Varto- Onder Aslan û gelek hevrêyên me yên hêja yên fedaî perwerdeyê distîne û bi saya van perwerdeyan dikare bibe milîtanekî Apoyî yê serkeftî. Hevrêyê me Yilmaz ji çalakiyên fedaiyane yên di sala 2016’an de ku bi taybetî jî weke sala fedaiyan tê zanîn û ji sekna hevrêyên xwe yên ev çalakî pêk anîne bandor dibe, li ser kesayeta xwe veguherînên mezin pêk tîne û xwe bi temamî bexşî têkoşîna azadiyê dike.

Hevrêyê me Yilmaz piştre di bin sîwana Hêzên Taybet de di gelek xebatên cuda de cih digire û bi saya zanînên xwe yên teknîkî û jêhatîbûna xwe di mezinkirina têkoşîna me de dibe xwediyê kedeke mezin. Hevrêyê me sereketirîn rojev û pêşaniya xwe dike pêşxistina têkoşîna me ya bi berdewamî û bi lêgerîn û pêşniyarên xwe yên têkildarî vê yekê derdikeve pêş. Hevrê Yilmaz di serî de Herêmên Parastinê yên Medyayê li hemberî êrîşên dewleta Tirk ên li ser qadên gerîlayan û gelê me  ji bo ku şerî li bajarên Tirkiyeyê belav bike xwe kûr dike û li gel pêşniyarên xwe dikare hevrêyên xwe qanih bike. Hevrêyê me Yilmaz dixwaze dewleta Tirk hemû rastiya şerî bijî û hîs bike û digihîje wê baweriyêku wê bes bi vî awayî têkoşîna azadiyê ya gelê me serkeftinê bi dest bixe. Hevrê Yilmaz kûrbûnên xwe yên bi vî rengî didomîne û ji aliyekî din ve jî hemû erk û berpirsiyariyên xwebi awayekî serkeftî bi cih tîne. Hevrêyê me Yilmaz bi saya hevrêtiya xwe ya jidil û durist, kesayeta xwe ya fedakar, kedkar û mutewazî ji aliyê hemû hevrêyên xwe ve gelekî tê hezkirin û karî bibe milîtanekî Apoyî yê mînak.

Hevrêyê me Yilmaz di encama êrîşeke dijmin a di 27’ê Kanûna 2021’an de li gel hevrêyê me Gelhat Cûdî tevlî karwanê şehîdan dibe û wê tim bibe meşaleya rêya me ronî dike. Weke hevrêyên wî di şexsê hevrêyê xwe Yilmaz de em soz didin ku heya pêkanîna xeyal û armancên hemû şehîdên xwe em ê tu carî ji têkoşîna bi xwe paşve gav neavêjin.

 26’ê Berfanbara 2025

Navenda Ragihandin û Çapemeniya HPG